رووداو دیجیتاڵ
پارتی ریفۆرمی بەریتانیا سەرکەوتنێکی گەورەی لە هەڵبژاردنی هەرێمی و خۆجێیی شانشینی یەکگرتوو تۆمار کرد و توانی لە پارتێکی ئۆپۆزیسیۆنی بچووکەوە ببێتە یەکێک لە گەورەترین هێزە سیاسییەکانی وڵاتەکە.
پارتی ریفۆرم توانی زیاتر لە هەزار و 400 کورسیی ئەنجوومەنی شارەوانییەکان لە ئینگلاند، 34 لە پەرلەمانی وێڵز و 17 لە پەرلەمانی سکۆتلاند بەدەستبهێنێت. پارتەکە توانی کۆنترۆڵی چەند شارەوانییەک بگرێتە دەست، کە نزیکەی دەیان ساڵ بوو بەدەست پارتەکانی کار و پارێزگارانەوە بوون.
پارتی ریفۆرمی بەریتانیا کێن و چییان لە هەگبەدایە؟
پارتێکی پۆپۆلیستی راستڕۆیە. پارتەکە دەیەوێت باجەکان کەمبکرێنەوە، خەرجییەکانی حکومەت کەمبکرێنەوە، کۆچبەران بە تووندی کۆنترۆڵ بکرێن و بەشێک لە یاساکانی تایبەت بە وزەی سەوز هەڵبوەشێندرێنەوە.
نایجل فەراج، سەرۆکایەتی پارتەکە دەکات.
پارتەکە چۆن دروستبوو؟
پارتەکە لە تشرینی دووەمی 2018 بەناوی "پارتی برێکزیت" لەلایەن نایجل فەراج و کاسرین بلایکلۆکەوە دامەزرا. ئامانجی پارتەکە جیابوونەوەیەکی یەکجاری بوو لە یەکێتیی ئەورووپا (برێکزیت بێ رێککەوتن). لە هەڵبژاردنی ساڵی 2019ی پەرلەمانی ئەورووپادا سەرکەوتنێکی گەورەی بەدەستهێنا. لە کانوونی دووەمی 2021 ناوی پارتەکە گۆڕدرا بۆ "ریفۆرم یوو کەی" بۆ ئەوەی زیاتر سەرنج بخاتە سەر پرسە گەورەکانی بەریتانیا وەکو کۆچ و باج. فەراج بۆ ماوەیەک لە پارتەکە دوورکەوتەوە، بەڵام ئێستا دووبارە بووەتەوە بە کەسی یەکەمی پارتەکە.
ئەو کورسییانەی لە دوایین هەڵبژاردنە خۆجێییەکاندا بەدەستیهێناون
دوایین هەڵبژاردنە خۆجێییەکان لە 7ی ئایاری 2026 لە سەرتاسەری 136 ئەنجوومەنی ئینگلتەرا بەڕێوەچوون.
بابەتی پەیوەندیدار
پارتی ریفۆرم سەرکەوتنی گەورەی بەدەستهێنا: زیاتر لە 1,400 کورسیی نوێی ئەنجوومەنەکانی بردەوە و کۆنترۆڵی تەواوەتیی چەندین ئەنجوومەنی کرد (لەوانەش بۆ یەکەمجار شارەوانییەکی لەندەن). ئەمە دووەمین ساڵی لەسەریەکی سەرکەوتنە گەورەکانی بوو، دوای ئەوەی لە ساڵی 2025ـدا توانی 677 کورسی بەدەستبهێنێت.
سیاسەتە سەرەکییەکان
ئیسرائیل: پارتی ریفۆرمی بەریتانیا لایەنگری سەرسەختی ئیسرائیلە. پارتەکە پشتیوانی لە "مافی ئیسرائیل دەکات بۆ بەرگریکردن لەخۆی"، پشتگیری لە فرۆشتنی چەک بە ئیسرائیل دەکات و گرووپی "دۆستانی ریفۆرمی ئیسرائیل"ی دامەزراندووە. فەراج هێرشەکانی ئیسرائیلی بە پێویست ناوبردووە و تۆمەتەکانی جینۆساید یان داواکارییەکان بۆ دەستگیرکردنی سەرکردەکانی ئیسرائیل رەتدەکاتەوە.
ترەمپ و ئەمریکا: پارتەکە دیدگایەکی زۆر ئەرێنیی بەرامبەر بە ئەمریکا و دۆناڵد ترەمپی سەرۆک هەیە. فەراج هاوڕێی ترەمپە و ستایشی سیاسەتەکانی دەکات. ریفۆرم دەیەوێت بەریتانیا و ئەمریکا هاوپەیمانییەکی نزیکیان هەبێت و دەڵێت، سیاسەتی دەرەوەی پارتەکەیان لەگەڵ رێکارە تووندەکانی ترەمپدا یەکدەگرێتەوە.
کۆچبەران: ریفۆرم دەیەوێت کۆتایی بەو شتە بهێنێت کە بە "لەشکرکێشیی" کۆچبەرانی نایاسایی ناوی دەبات. پلانەکانیان ئەمانە لەخۆدەگرن: دیپۆرتکردنەوەی خێرای بەکۆمەڵ (کە دەگاتە سەدان هەزار کەس)، دامەزراندنی "فەرماندەیی دیپۆرتکردنەوە"ـی نوێ هاوشێوەی ICEـی ئەمریکا، کشانەوە لەو پەیماننامانەی مافی مرۆڤ کە رێگرن لە ناردنەوەی کۆچبەران و راگرتنی بەشێکی زۆری کۆچی یاسایی. پارتەکە دەڵێت، رێژەی بەرزی کۆچبەران زیان بە نیشتەجێبوون، سیستەمی تەندروستیی نیشتمانی (NHS) و کولتووری بەریتانی دەگەیەنێت.
موسڵمانان: پارتەکە رەخنە لە ئیسلامی رادیکاڵ و فرەکولتووری دەگرێت. دەیەوێت ئیخوان موسلیمین وەک گرووپێکی تیرۆریستی قەدەخە بکات، دەڵێت بەشێکی زۆری گەنجانی موسڵمان بڕوایان بە بەهاکانی بەریتانیا نییە، هەروەها کولتووری بەریتانی لەپێش هەموو شتێکەوە دادەنێت. پارتەکە سەرنجی خستووەتە سەر وەستاندنی "ئیسلامیزم" یاخود ئیسلامی سیاسی، هاوکات بانگەشەی ئەوە دەکات کە دژی هەموو موسڵمانان نییە.