رووداو دیجیتاڵ
نووسەرێکی ڕۆژهەڵاتی کوردستان، لە ڕێگەی نوێترین کتێبییەوە پەیامی ئاشتی و پاراستنی مافی ژنان و منداڵان دەگەیێنێتە پاپای ڤاتیکان و سەرکردە باڵاکانی جیهان.
حەسەن ئازادە، نووسەری خەڵکی پیرانشاری ڕۆژهەڵاتی کوردستان کە ئێستا نیشتەجێی وڵاتی سویسرایە، لە نوێترین بەرهەمی خۆیدا بە ناوی (8 ملیار و 156 ملیۆن نیگا بۆ ئاشتی جیهانی)، داوای کۆتاییهێنان بە شەڕ و توندوتیژی دەکات. کتێبەکە بە سێ زمانی (کوردی، ئینگلیزی و فارسی) نووسراوە و چیرۆکەکە لە زمانی کوڕە 13 ساڵانەکەیەوە دەگێڕدرێتەوە.
حەسەن ئازادە لە بەرنامەی (دیاسپۆرا)ی ڕووداو تیشکی خستە سەر هەوێنی نووسینی کتێبەکەی و ڕایگەیاند: "لە سەروبەندی هەڵگیرسانی جەنگی ئۆکراینادا، کاتێک وەک پەنابەر گەیشتینە ئەورووپا، دیمەنی هەزاران ژن و منداڵی ئۆکراینیم بینی کە بەهۆی شەڕەوە ئاوارە ببوون؛ ئەو دیمەنانە بوونە پاڵنەر بۆ ئەوەی چیرۆکی خۆمان و ئەو پەنابەرانە لە کتێبێکدا کۆبکەمەوە و داوای ئاشتی بۆ منداڵانی جیهان بکەم.
بابەتی پەیوەندیدار
"
ئەم نووسەرە کوردە هەڵمەتێکی بۆ گەیاندنی پەیامەکەی دەستپێکردووە و کتێبەکەی بۆ چەندین سەرکردەی جیهانی ناردووە. تاوەکو ئێستا پاپای ڤاتیکان و وەزیری ناوخۆی سویسرا کتێبەکەیان پێگەیشتووە.
ئازادە ئاماژەی بەوەش کرد، کە لە پلانیدایە کتێبەکە بۆ سەرۆک مەسعود بارزانی و هەروەها بەرهەم ساڵح، کۆمیسیاری باڵای پەنابەران لە نەتەوە یەکگرتووەکان بنێرێت، بەو ئومێدەی دەنگی ئاشتیخوازیی منداڵان بگاتە ناوەندە بڕیاربەدەستەکان.