رووداو دیجیتاڵ
کۆنگرێسمانێکی ئەمریکا لە لێدوانێکیدا بۆ تۆڕی میدیایی رووداو، پشتیوانیی خۆی بۆ کەمکردنەوەی هەژموونی ئێران لە عێراق دەربڕی و رایگەیاند، لاوازبوونی ئێران یارمەتیی بەغدا دەدات حکومەتێکی "دادپەروەر و ئازاد" پێکبهێنێت، ئەمەش لە کاتێکدایە گفتوگۆکان بۆ دیاریکردنی سەرۆکوەزیرانێکی نوێ لە عێراق بەردەوامن.
جۆ ویڵسن، ئەندامی ئەنجوومەنی نوێنەرانی ئەمریکا لە پارتی کۆماری بۆ ویلایەتی کارۆلاینای باشوور، لە لێدوانێکی تایبەتدا بە دیار کوردە، بەڕێوەبەری نووسینگەی واشنتنی رووداوی رایگەیاند، گرنگیدانی بە عێراق لەوەوە سەرچاوەی گرتووە کە دوو کوڕەکەی لەوێ خزمەتی سەربازییان کردووە.
جۆ ویڵسن بە رووداوی گوت: "ئامانجی سەرەکی ئەوەیە هەژموونی ئێران نەهێڵدرێ."
ئەو ئەندامەی کۆنگرێس ئاماژەی بەوەش کرد، نەمانی توانای ئێران بۆ دەستوەردان لە کاروباری ناوخۆی عێراق "پێویستە وزە و گوڕوتین بداتە گەلی عێراق بۆ ئەوەی حکومەتێکی ئازاد و دادپەروەر دابمەزرێنن."
ویڵسن پشتیوانیی خۆی بۆ گوشارەکانی ئەمریکا لەسەر بەغدا دەربڕی بە مەبەستی جڵەوکردن و چەککردنی ئەو گرووپە چەکدارانەی کە پەیوەندییان بە ئێرانەوە هەیە.
ئەو کۆنگرێسمانە گوتی: "لە راستیدا شتە سەرەکییەکە نەهێشتنی هەژموونی ئێرانە، چ لەرێگەی گرووپە میلیشیاکانەوە بێت یان لەرێگەی ترساندنی کەسایەتییە سیاسییەکان."