رووداو - تەندروستی
تیمێک لە 50 پسپۆڕ و شارەزای بواری پزیشکی و تەندروستیی سەر بە لیژنەی پزیشکیی لانسێت ئاشکرای دەکەن، تاوەکو 2050 پێویستە رێژەی مردنی پێشوەختە واتە لە خوار کەسانی 70 ساڵان نیو ئەوەندە کەمببێتەوە، ئەنجامێکیش لەبارەی پەتای داهاتووەوە ئاشکرادەکەن.
تیمەکە لە ناوچە و زانکۆ جیاوازەکانی جیهان دابەشکراون، تاوەکو توێژینەوەیەکی جیهانی و گشتگیر ئەنجامبدەن بۆ ئەوەی لە پەتای داهاتوو بکۆڵنەوە و ئەگەری گیانلەدەستدانی پێشوەختە تاوەکو 2050، نزیکەی 50٪ کەمبکەنەوە.
هاوکات راپۆرتەکە هۆشداری دەداتە وڵاتان کە جەخت لە 15 هۆکاری مردنی لەناکاو بکەنەوە و هەوڵبدەن بۆ پێشگیری و کەمکردنەوەیان کە هەشتیان پەیوەندییان بە نەخۆشییە گوازراوە و تەندروستیی دایکانەوە هەیە، حەوتیشیان پەیوەندییان بە نەخۆشییە درێژخایەنەکانەوە هەیە.
لە بەشێکی راپۆرتی لیژنەی پزیشکیی لانسێت دا هاتووە، لە 10 ساڵی داهاتوودا زیاتر لە 20٪ ئەگەری بڵاوبوونەوەی پەتایەک هەیە کە لانیکەم 25 ملیۆن کەس بکوژێت، ئەمەش وایکردووە کە یەکێک لە مژارە سەرەکییەکانی لووتکەی تەندروستیی جیهانی، پێشگیری لە پەتاکان و نەخۆشییە گوازراوەکان بێت.
ئەنجامی راپۆرتەکە لە یەکەم رۆژی لووتکەی تەندروستیی جیهانی ئاشکرادەکرێت کە لە بەرلین بەڕێوەدەچێت.