باڵیۆزی ئەمریکا لە عێراق: بە ئامانجگرتنی سیستانی رەتدەکەینەوە

رۆژی پێنجشەممە 10-10-2024 ئەلینا رۆمانۆوسکی، باڵیۆزی ئەمریکا لە عێراق لە تۆڕی کۆمەڵایەتیی ئێکس نووسی، "ئایەتوڵڵا سیستانی، سەرکردەیەکی ئایینی دیار و رێزلێگیراوە لە کۆمەڵگەی نێودەوڵەتی. ئەو دەنگێکی گرنگ و کاریگەرە بۆ پاراستنی ئاشتیی ناوچەکە. هەموو بەئامانجگرتنێکی ئەو رەتدەکەینەوە. ویلایەتە یەکگرتووەکانی ئەمریکا بەردەوامە لە پشتیوانیکردن لە هەوڵەکانی پەرەپێدانی ئاشتی لە ناوچەکە".

دوێنێ چوارشەممە، کەناڵ 14ـی ئیسرائیلی لە بەرنامەیەکدا وێنەی چەند کەسایەتییەکی رۆژهەڵاتی نێوەڕاستی لە ستۆدیۆ پێشاندا، هەریەک لە وێنەکان نیشانەیەکی سووری نیشانەشکێنی لەسەربوو، ئەمەش بە مەبەستی ئەوەی ئەوانە "ئامانجی داهاتوون".

لە وێنەکان هەریەک لە عەلی خامنەیی، رێبەری کۆماری ئیسلامیی ئێران؛ یەحیا سینوار، سەرۆکی مەکتەبی سیاسیی حەماس؛ ئیسماعیل قائانی، فەرماندەی فەیلەقی قودسی سوپای پاسداران؛ نەعیم قاسم، جێگری ئەمینداری گشتیی حیزبوڵڵا و عەلی سیستانی، مەرجەعی باڵای شیعەکانی عێراق دەرکەوتن.

لەسەر ئەوە، باسم عەوادی، گوتەبێژی حکومەتی عێراق رایگەیاند، "حکومەتی عێراق بە تووندی سەرکۆنەی هەر هێرشێک بۆ سەر مەرجەعی باڵای ئایینیمان دەکات، کە لەلایەن هەموو عێراقییەک، کۆمەڵگەی نێودەوڵەتی و جیهانی ئیسلامی و عەرەبی رێزلێگیراوە. ئەم جۆرە هەوڵە ترسناکانە رەگی رەگەزپەرستییە و بێڕێزییە بەرامبەر پیرۆزیی نەتەوەکان".

دوایین لێدوانی سیستانی لە رۆژی 23-09-2024 بوو. مەرجەعی باڵای شیعەکانی عێراق لە راگەیێندراوێکدا  لەبارەی دۆخی لوبنان و شەڕی ئیسرائیل و حیزبوڵڵاوە، بەبێ ئەوەی لە هیچ شوێنێکدا باسی حیزبوڵڵای لوبنانی یان پشتیوانیلێکردنی بکات، رایگەیاند، "لەم رۆژە سەختانەدا گەلی لوبنانی ئازیزی پێدا تێدەپەڕن، رووبەڕووی زیادبوونی هێرشە ناڕەواکانی ئیسرائیلی دووژمن دەبنەوە".

مەرجەعی باڵای شیعەکان هاوسۆزی خۆی بۆ لوبنانییەکان دەربڕی، "دەستی نزا بۆ خوای گەورە بەرزدەکەینەوە داوای لێدەکەین بیانپارێزێت و لە خراپەی خراپەکاران بەرگریان لێبکات و شەهیدانیان بەر رەحمەتی خودا بکەون و بریندارەکانیان چاکببنەوە".