رووداو دیجیتاڵ
دادگەى باڵاى فیدراڵی عێراق چوار سکاڵا لەبارەى هەڵبژاردنى سەرۆکى نوێی پەرلەمان تاوتوێ دەکات، کە رکابەرانى ئەو پرسە لە دژى یەکدى تۆماریان کردووە، لەکاتێکدا لە کۆبوونەوەکەى 27ى کانوونى دووەمى پەرلەمان، هەڵبژاردنى سەرۆک یەکێکە لە بڕگەکانى. ئەندامێکى لیژنەى یاسایى دەڵێت، یان سەرلەنوێ دەرگەى خۆپاڵاوتن دەکرێتەوە یان کۆبوونەوەکە دوادەخرێت.
رۆژی 29ى کانوونى دووەمى 2024، دادگەى باڵاى فیدراڵى عێراق تاوتوێى چوار سکاڵا دەکات، کە تایبەتن بە پرسی هەڵبژاردنى سەرۆکى نوێى پەرلەمان و بەربژێرەکانی ئەو پۆستە.
لە دوو سکاڵایاندا پەرلەمانتاران یوسف کیلابی، فالح خەزعەلی، حوسێن موئەنیس کە هەرسێکیان شیعەن، داوا دەکەن بەربژێرکردنى شەعلان کرەیم، بەربژێرى فراکسیۆنى تەقەدووم بۆ ئەو پۆستە هەڵبوەشێندرێتەوە و مافى ئەندامێتیشى وەک پەرلەمان لێ وەربگیرێتەوە.
سەرۆکایەتیى پەرلەمانى عێراق، 14ـی کانوونى دووەمی 2024، دانیشتنى تایبەت بە هەڵبژاردنى سەرۆکى نوێى پەرلەمانى بۆ کاتێکى نادیار هەڵگرت لە پاش ئەوەى گەیشتە گەڕى دووەمى دەنگدان لە نێوان شەعلان کرەیم، بەربژێرى هاوپەیمانیى تەقەدووم، لەگەڵ سالم عیساوى، بەربژێرى هاوپەیمانیى سەروەرى.
بەشێک لە پەرلەمانتارانى شیعە شەعلان کرەیم تۆمەتبار دەکەن بەوەى پەیوەندى بە حیزبى بەعس هەبووە و ئەوەش لەدژى یاساى لێپرسینەوە و دادوەرییە، کە تایبەتە بە رێگرى لە بەرپرسانى باڵاى پێشووى حیزبى بەعس بۆ ئەوەى پۆستە باڵاکان لە عێراق بگرنە دەست.
یەکێک لە سکاڵاکانى دیکە لەلایەن باسم خەشان، ئەندامى پەرلەمانى عێراق تۆمارکراوە، کە داوا دەکات دادگە بڕیارێکى کاتى دەربکات بۆ لێکۆڵینەوە لە مەرجى ئەو پێنج پەرلەمانتارەى خۆیان بۆ پۆستى سەرۆکى نوێى پەرلەمان بەربژێر کردبوو.
جگە لە شەعلان کرەیم، سالم عیساوى، لە کۆبوونەوەى 13ى کانوونى دووەمى پەرلەمان سێ بەربژێرى دیکە هەبوون کە لە گەڕى یەکەمى دەنگدان نەیانتوانى دەنگى پێویست بەدەست بهێنن بۆ ئەوەى بچنە گەڕى دووەمى رکابەرییەوە، کە پێکهاتبوون لە مەحموود مەشهەدانى، عامر عەبدولجەبار و تەڵال زەوبەعی.
رۆژی 14ـی تشرینى دووەمی 2023، دادگەى باڵاى فیدراڵیی عێراق لەسەر سکاڵایەکى لەیس دلێمى، ئەندامێتیى محەممەد حەلبووسی لە پەرلەمانى عێراق هەڵوەشاندەوە، سوننەکان و بەتایبەت فراکسیۆنى تەقەدووم ئەو پۆستە بە پشکى خۆیان دەزانن.
سکاڵاى چوارەم کە لە دادگەى باڵاى فیدراڵى تاوتوێ دەکرێت لەلایەن هەیبەت حەلبووسی و ئەحمەد جبوورى، ئەندامانى فراکسیۆنى تەقەدووم لە دژى موحسین مەندەلاوى، جێگرى یەکەمى سەرۆکى پەرلەمان تۆمارکراوە، کە ئێستا لەبرى سەرۆکى پەرلەمان بە کاتى کاروبارى پەرلەمان بەڕێوە دەبات.
لە سکاڵاکەدا ئەو دوو پەرلەمانتارە سوننەیە داوا دەکەن کۆبوونەوەى 13ى کانوونى دووەمى پەرلەمان بە "نادەستوورى" بناسێنێت کە تایبەت بوو بە هەڵبژاردنى سەرۆکى پەرلەمان و سەرجەم ئەو رێوشوێن و بڕیار و ئەنجامانەى لە کۆبوونەوەکە کەوتووەتەوە هەڵبوەشێندرێتەوە.
بەگوێرەى خشتەى کۆبوونەوەەکانى پەرلەمانى عێراق لە 27ى کانوونى دووەم، هەڵبژاردنى سەرۆکى پەرلەمان یەکێکە لە بڕگەکانى. رۆژی 26ى کانوونى دووەمى 2024 ، دارا سێکانیانى، ئەندامى لێژنەى یاسایی پەرلەمانى عێراق بە تۆڕى میدیایی رووداوى راگەیاند: دوو ئەگەر لە بەردەم کۆبوونەوەى شەممەى پەرلەمان هەیە بۆ هەڵبژاردنى سەرۆکى نوێ، یان جارێکى دەرگاى خۆ بەربژێرکردن بۆ ئەو پۆستە دەکرێتەوە، یان دەنگ لەسەر دواخستنى دانیشتنەکە دەدرێت بۆ هەڵبژاردنى سەرۆکى پەرلەمان.