وەزیری دەرەوەی هۆڵەندا: پێویستە کورد، کریستیان و پێکهاتەکانی دیکە رۆڵیان لە داهاتووی سووریا هەبێت

ماڵپەڕی حکومەتی ناوەندیی هۆڵەندا بڵاویکردەوە، نێردەی تایبەتی وڵاتەکەیان لەگەڵ بەرپرسانی باڵای سووریا کۆبووەتەوە و جەختی لە گرنگی سیاسەتێکی راگوزەری گشتگیر و پاراستنی کەمینەکان کردەوە. بە گوێرەی میدیای هۆڵەنداش، نێردەکە راپۆرتێکی تایبەتی سەبارەت بە سەردانەکەی داوەتە وەزیری دەرەوە و ئەویش رادەستی پەرلەمانی کردووە.

رۆژی یەکشەممە، 5ی کانوونی یەکەمی 2024، ماڵپەڕی حکومەتی ناوەندیی هۆڵەندا بڵاویکردەوە، "رۆژانی 2 بۆ 4ی کانوونی دووەم خایش خێرلاخ، نێردەی تایبەتیی هۆڵەندا بۆ کاروباری سووریا سەردانی دیمەشقی کرد". دەشڵێت، خێرلاخ قسەی لەگەڵ بەرپرسانی حکومەتی کاتی، بە سەرۆکایەتیی هەتەشە کرد بۆ ئاگاداربوون لە دۆخی ئەمنی و گەیاندنی پەیامی کاسپەر ڤێڵدکامپ، وەزیری دەرەوەی هۆڵەندا سەبارەت بە گرنگی سیاسەتێکی راگوزەری گشتگیر و پاراستنی کەمینەکان".

رۆژی 8ی کانوونی یەکەمی رابردوو، حکومەتی سووریا لە لایەن گرووپە چەکدارە ئۆپۆزسیۆنەکانەوە رووخێندرا و بەشار ئەسەد، سەرۆکی سووریاش هەڵات بۆ رووسیا. دواتر، حکومەتێکی کاتی لە سووریا تاوەکو ئاداری داهاتوو پێکهێندرا. بەرپرسانی وڵاتانی ناوچەکە، ئەورووپا و ئەمریکا دەستیان بە دروستکردنی پەیوەندی و گفتوگۆ لەگەڵ بەرپرسانی سووریا کرد. 

سەبارەت بە سەردانەکە، وەزیری دەرەوەی هۆڵەندا گوتی، "سیاسەتێکی راگوزەری گشتگیر کە لە لایەن سوورییەکانەوە سەرۆکایەتی بکرێت بۆ هۆڵەندا جێگەی بایەخە و گرنگیشە بۆ سەقامگیری سووریا". دەشڵێت، "زۆر گرنگە کریستیانەکان، کوردەکان و کەمینەکانی دیکەش بەشێکبن لەم پرۆسەیە و مافەکانی فرۆڤیش بپارێزرێن".

ئەو وەزیرە هۆڵەندییە ئاماژەی بەوەش کرد، "سەردانەکەی خێرلاخ بۆ دۆزینەوەی رێگەیەکە بۆ چۆنیەتی پاڵپشتیکردنی ئەم سیاسەتە (سیاسەتی راگوزەری گشتگیر) لە لایەن هۆڵەندا و یەکێتیی ئەورووپاوە. پاڵپشتیکردنی سەقامگیریی سووریا ویستی هۆڵەندایە، بەتایبەت لە وارەکانی رووبەڕووبوونەوەی تیرۆر و گەڕاندنەوەی ئاوارەکان بۆ شوێنی خۆیان".

بە گوێرەی نەتەوە یەکگرتووەکان، بەهۆی شەڕی نێوخۆی سووریاوە نزیکەی 7.2 ملیۆن هاووڵاتی ئاوارە بوون. هەروەها، 70٪ی دانیشتووانی وڵاتەکە پێویستیان بە هاوکاری مرۆییە. 

وەزیری دەرەوەی هۆڵەندا جەختی لەوەش کردەوە، وڵاتەکەی پابەندە بە بەسزاگەیاندنی ئەو کەسانەی دەستیان لە پێشێلکارییەکانی مافی مرۆڤ هەبووە لە سووریا. 

نێردەی تایبەتیی هۆڵەندا لەگەڵ بەرپرسانی نووسینگەی نێردەی نەتەوە یەکگرتووەکان بۆ کاروباری سووریا، نووسینگەی کۆمیسیاری باڵای نەتەوە یەکگرتووەکان بۆ مافەکانی مرۆڤ، ژمارەیەک رێکخراوی ناحکومی لە دیمەشق و ژمارەیەک سەرکردەی کریستیانەکانی ئەو وڵاتەدا کرد. 

بە گوێرەی ئەو راگەیێندراوەی سەبارەت بە سەردانی نێردەی هۆڵەندا بۆ کاروباری سووریا بڵاوکراوەتەوە، حکومەتی ئەمستردام نیازی نییە جارێ باڵیۆزخانەکەی لە سووریا بکاتەوە، بەڵام لە گفتوگۆدا دەبن لەگەڵ بەرپرسانی دیمەشق. هەروەها، حکومەتی هۆڵەندا لەگەڵ وڵاتانی دیکەی هاوپەیمانی بڕیار لەسەر داهاتووی پەیوەندییەکانیان لەگەڵ حکومەتی سووریا دەدەن بە پشتبەستن بەو کارانەی حکومەتی ئەو وڵاتە لە ماوەی داهاتوودا دەیانکات.

بە گوێرەی میدیای هۆڵەندا، دوای گەڕانەوەی خێرلاخ بۆ هۆڵەندا راپۆرتێکی تایبەتی سەبارەت بە سەردانەکەی داوەتە وەزیری دەرەوە و ئەویش رادەستی پەرلەمانی وڵاتەکەی کردووە. 

رۆژی 21ی کانوونی یەکەمی 2024، قەتەر وەکو دووەم وڵات باڵیۆزخانەکەی لە سووریا کردەوە دوای رووخانی رژێمەکەی ئەسەد. تورکیا یەکەم وڵات بوو ئەو کارەی کرد. هەروەها، ژمارەیەک وڵای دیکەش، لەوانە عێراق، ئامادەیی خۆیان پێداچوونەوە بە بڕیاری داخستنی باڵیۆزخانەکانیان لە سووریا پیشانداوە.