دانیمارک: دەمانەوێت بە یاسا رێگە لە سووتاندنی قورئان بگرین

رۆژی هەینی 25ـی ئابی 2023، پیتەر هومێڵگارد، وەزیری دادی دانیمارک لە راگەیێندراوێکدا گوتی: "حکومەت یاسایەک پێشکێش دەکات کە مامەڵەی نەشیاو لەگەڵ ئەو شتانەی کە پێگەی ئایینی بەرچاویان هەیە، قەدەخە دەکات." 

پیتەر دەربارەی سووتاندنی قورئانی پیرۆز دەڵێت: "کردەوەیەکی سووکایەتیپێکردن و بێ هاوسۆزییە کە زیان بە دانیمارک و بەرژەوەندییەکانی دەگەیێنێت." 

ئامانجی سەرەکیی یاساکە، بەگوتەی وەزیری دادی دانیمارک، قەدەخەکردنی سووتاندن و پیسکردنی هەموو کتێبە ئایینییەکانی دیکەیە. ئەو کەسانەشی پابەندی یاساکە نابن رووبەڕووی پێبژاردن و دوو ساڵ بەندکردن دەبنەوە. 

لە ماوەی رابردوودا، حکومەتی دانیمارک سنوورەکانی وڵاتەکەی تووندتر کرد و هۆکارەکەیشی بۆ "زیادبوونی هەڕەشەکان گەڕاندەوە."  

سووتاندنی چەند کۆپییەکی قورئانی پیرۆز لە کۆتایی مانگی شەشەوە لە سوێد و دانیمارک کاردانەوەی بەشێک لە موسڵمانانی لێکەوتووەتەوە. 

سەلوان مۆمیکا، کە پەناخوازێکی عێراقییە و لە سوێد دەژی رۆژی 28-06-2023 کۆپییەکی قورئانی پیرۆزی سووتاند، دواتیش لە 31-7-2023 بێڕێزی بە قورئانی پیرۆز کرد.

لە دانیمارکیش، ئەندامانی گرووپێکی تووندڕۆ بە ناوی "Danske Patrioter" [نیشتمانپەروەرانی دانیمارکی] تائێستا سێ جار قورئانی پیرۆزیان سووتاندووە. 

سووتاندنی قورئانی پیرۆز کاردانەوەی نێودەوڵەتی لێکەوتەوە و هەریەک لە عێراق، ئێران، سعودیە، ئەمریکا، ئەڵمانیا، سوێد و چەندین وڵاتێکی دیکە سەرکۆنەیان کرد.  

رۆژی 31ـی تەممووزی 2023، رێکخراوی هاریکاریی ئیسلامی لە شاری جەدە لە سعودیە کۆبوونەوەیەکی نائاسایی کرد و لە راگەیێندراوێکدا رایگەیاند، "هەر 57 وڵاتە ئەندامەکە دەبێت رێکاری پێویست بەرامبەر سوێد و دانیمارک و ئەو وڵاتانەی کە رێگە بەوجۆرە کارانە دەدەن بگرنە بەر."