رووداو دیجیتاڵ
لەگەڵ نزیکبوونەوەی حەج، لە هەندێک کەناڵ رێکلام بۆ "بەدەل حەج" و بە نرخێکی هەرزان دەکرێت. گوتەبێژی حەج و عومرە دەڵێت، لە رێگەی وەزارەتی رۆشنبیرییەوە ئەو کەناڵانە دادەخەن. هەروەها نوێترین زانیاری لەبارەی گەشتی حاجییان دەخاتەڕوو.
لە کەناڵێکی تەلەڤزیۆنی لەگەڵ بڵاوکردنەوەی ژمارەی مۆبایلدا لە رێکلامێکدا بە رێنووسێکی پڕ لە هەڵە و کوردییەکی خراپ نووسراوە: "بە دل حەج 350 دۆلار ئەنجام ئەدەین بە ڤیدیۆ شهادەوعەجوەو ئاوی زم زم".
لە تۆڕە کۆمەڵایەتییەکانیش ئەم رێکلامە بڵاوکراوەتەوە، "بەدەل حەج بۆ مردوو؛ نەخۆشی پەککەوتە و زیندانیی بەناحەق گیراوی هەتاهەتایی دەکەین بە 350 دۆلار، بە کەسی باوەڕپێکراو و ڤیدیۆی چیای عەرەفە و قوربانیکردن و پێنج لیتر ئاوی زەمزەم".
کاروان ستوونی، گوتەبێژی بەڕێوەبەرایەتی حەج و عومرەی هەرێمی کوردستان، ئەمڕۆ هەینی بە تۆڕی میدیایی رووداوی گوت: "یەکشەممە نووسراوی فەرمی بۆ وەزارەتی رۆشنبیری دەکەین ئەو کەناڵانە دابخەن ئەو جۆرە رێکلامانە دەکەن، ئەوانەشی کۆمپانیان خۆمانن بانگیان دەکەین و لێپێچینەوەی یاساییان لەگەڵ دەکەین".
بە گوتەی کاروان ستوونی، "رێکلامەکان چەواشەکارییان تێدا دەکرێ، کەس لێرەوە نانێرن لەوێ بەدەل حەج بکات، بەڵکو خەڵکی وڵاتانی وەکو بەنگلادیش و پاکستان هەن لە سعودیە دەیاننێرن لە دوو گۆشەوە ڤیدیۆی رێوڕەسمەکانی حەج بگرن، هەروەها بڕوانامەیەک کۆپی دەکەن و تەنیا ناوەکەی دەگۆڕن، کە بە پارەی عێراقی دوو هەزار دیناری تێدەچێت".
بابەتی پەیوەندیدار
کوردستان13/05/2026
هێمن هەورامی: تەنیا 5%ـی رێککەوتنەکەمان لەگەڵ سوودانی جێبەجێ کرا
کوردستان13/05/2026
بارین، ئەو کچەی بە هەڵگرتنی پەرداخێک ئێسکەکانی دەشکێن
تاوەکو ئەمڕۆ ناڕوونە کە گەشتی رێوڕەسمەکانی حەج لە هەرێمی کوردستانەوە چۆن دەبێ، سەرەتا بڕیاردرا 6ـی ئایار لە رێگەی وشکانییەوە بێت، دواتر گۆڕا بۆ ئەوەی بە وشکانی تاوەکو دەروازەی عەرعەر بچن و 12ـی ئایار لە عەرعەرەوە بە فڕۆکە بگەیێندرێنە شاری جەددەی سعودیە، ئێستاش دەنگۆ هەیە گۆڕانکاری نوێ کرابێ.
گوتەبێژی حەج و عومرە گوتی: "حکومەتی هەرێمی کوردستان لەسەر هێڵە بۆ ئەوەی باشترین رێگە بۆ حاجییانی هەرێمی کوردستان بدۆزێتەوە، هەوڵی جیدی هەیە لە فڕۆکەخانەکانی هەولێر و سلێمانییەوە راستەخۆ گەشتەکان بکرێن و ئەگەری رێککەوتن زۆر و بەهێزە، بەڵام تاوەکو ئەمڕۆ هەینی بە فەرمی رێککەوتن نەکراوە".
5120 کەس ئەم ساڵ ناویان گەڕاوەتەوە بچنە حەج. بەگوێرەی بەڕێوەبەرایەتیی حەج و عومرە بۆ رووداو، ڤیزەی هەموو ئەوانە گەڕاوەتەوە کە دەچنە حەج و زۆرینەی ئامادەکارییەکانی دیکەیان تەواو کراوە.