رووداو دیجیتاڵ
فەرماندەیەکی پێشووی سوپای بەریتانیا دەڵێت، کوردستان تەنیا چەمکێکی جیۆپۆلیتیکی نییە، بەڵکو "دوورگەی سەقامگیرییە" لەنێو دەریایەکی پڕ لە ئاژاوەدا. ئەو داوا لە لەندەن دەکات پشتگیرییەکانی بۆ پێشمەرگە بەردەوام بکات، چونکە بە بڕوای ئەو "بەبێ کورد، پاراستنی بەرژەوەندییەکانی رۆژئاوا لە ناوچەکەدا مەحاڵە."
هامیش دی بریتۆن-گۆردن، فەرماندەی پێشووی سوپای بەریتانیا و پسپۆڕی دیاری سەربازی، لە گوتارێکدا کە لە رۆژنامەی "تێلیگراف"ی بەریتانی بڵاوی کردووەتەوە، تیشک دەخاتە سەر پێگەی هەرێمی کوردستان.
ئەم فەرماندە بەریتانییە، کە لە ساڵانی 2015 بۆ 2017 لە جەنگی دژ بە داعش دا لە نزیکەوە لەگەڵ پێشمەرگە بووە، لە گوتارەکەیدا ستایشی ئازایەتیی ئەو هێزە دەکات و دەنووسێت، "ئەو ژن و پیاوانە (پێشمەرگە) لە ئازاترین جەنگاوەرانن، کە لە ژیانمدا بینیومن. ئەوان پشتی داعش-یان لەسەر زەوی شکاند؛ راستە فڕۆکە جەنگییەکان رۆڵیان هەبوو، بەڵام پێشمەرگە بوو کە بە خوێنی خۆی ئەفسانەی خەلافەتی تێکشکاند."
پەیوەندییەک لە رۆژە سەختەکاندا
بریتۆن-گۆردن لە گوتارەکەیدا ئاماژە بەوە دەکات، پەیوەندیی نێوان لەندەن و هەولێر رەگێکی مێژوویی قووڵی هەیە و دەگەڕێتەوە بۆ ساڵی 1991، کاتێک حکومەتەکەی جۆن مەیجەر "ناوچەی دژەفڕین"ی راگەیاند و رێگەی لە کۆمەڵکوژیی کورد گرت. ئەو دەڵێت، "ئەوە تەنیا کارێکی مرۆیی نەبوو، بەڵکو بڕیارێکی ستراتیژی بوو، کە وایکرد کوردستان ببێتە شوێنێکی جیاواز لە عێراق.
بابەتی پەیوەندیدار
کوردستان13/05/2026
هێمن هەورامی: تەنیا 5%ـی رێککەوتنەکەمان لەگەڵ سوودانی جێبەجێ کرا
کوردستان13/05/2026
بارین، ئەو کچەی بە هەڵگرتنی پەرداخێک ئێسکەکانی دەشکێن
"
خاڵێکی سەرنجڕاکێش، کە ئەم فەرماندەیە تیشکی دەخاتە سەر، ئەوەیە کە لە ساڵی 1991ـەوە تاوەکو ئێستا، تەنانەت یەک سەربازی بەریتانیش لە خاکی کوردستان دا نەکوژراوە یان بریندار نەبووە، ئەمەش بە بڕوای ئەو، گەورەترین بەڵگەیە لەسەر دۆستایەتی و ئارامیی ئەو ناوچەیە.
بریتۆن-گۆردن دەڵێت، ئەم سەقامگیرییە بە رێکەوت نییە، بەڵکو بەرهەمی حکومڕانییەکی دروست و هێزێکی ئەمنیی تۆکمەیە. ئاماژە بەوەش دەکات، زۆر لە سەرکردەکانی کورد لە بەریتانیا خوێندوویانە، ئەمەش وایکردووە لەڕووی بەها و بیرکردنەوەوە لە رۆژئاوا نزیک بن.
هەروەها گۆردن باس لەوە دەکات، لەم کاتەدا کە تەنگەی هورمز بەهۆی جەنگی ئێرانەوە داخراوە، بۆریی نەوتی کوردستان بۆ تورکیا دەتوانێت ببێتە رێگەی رزگارکەر بۆ دابینکردنی وزەی جیهان، ئەمەش گرنگیی ستراتیژیی هەولێر چەند هێندە دەکات.
هامیش دی بریتۆن-گۆردن، فەرماندەی پێشووی کەتیبەی تانکەکانی بەریتانیا و یەکێکە لە گەورەترین پسپۆڕانی جیهان لە بواری بەرگریی کیمیایی و بایۆلۆژی. هەر لەبارەی پەیوەندییەکانی لەندەن و هەولێردا دەڵێت، بەریتانیا لە ساڵی 2003 یەکێک بوو لە وڵاتە سەرەکییەکانی پڕۆسەی ئازادیی عێراق.
لە جەنگی دژ بە داعشیشدا، لەندەن بە رەوانەکردنی راوێژکاری سەربازی و دابینکردنی چەکی قورس، هاوکارییەکی بێ پێشینەی پێشمەرگەی کرد. ئێستا کە ناوچەکە لەبەردەم جەنگێکی نوێدایە لەنێوان ئەمریکا و ئێران، کوردستان جارێکی دیکە وەک کلیلی پاراستنی ئاسایش لە رۆژهەڵاتی نێوەڕاستدا دەردەکەوێتەوە.